老細繼續做埋啲好低能嘅嘢。
聽日我哋開工大吉，佢就而家先至係度諗點樣對抗疫情。我哋同其他出面一樣，其實裝備衣物唔會係無限多，總會有一日用完。我哋已經好醒咁一個月之前，已經諗定點樣買多啲口罩點樣買多啲PPE。我哋其他分店嘅N95竟然可以過期同發霉。其實呢啲嘢唔應該係我診所姑娘自己一個人上網去搵黎買。作為一間集團嘅公司，佢哋有責任同義務訂比我地。
講番老細，佢竟然可以叫我地不如循環再用PPE。用下啲酒精消毒下D Face Shield就算。咁其實同唔着裝備有咩分別? 點解呢啲裝備係一次性，就係唔想交叉感染自己或者下個病人。佢自己貴為醫生，竟然可以講啲咁不負責任嘅嘢，我都無言以對。佢將我哋前線，我哋嘅家人，同埋診所全部病人嘅健康黎開玩笑。咁不如佢落嚟自己一個人睇症，無限重用PPE。咁樣同口罩洗完再用有咩分別？可能佢真係覺得大陸啲奸商冇錯。
仲有，佢覺得如果有懷疑個案，就咁落醫生名就通知CHP 就OK。佢覺得我哋唔需要同個病人問症，唔需要做任何身體檢查，就咁等CHP直接送走個病人。但係我同CHP醫生交接過，佢哋係會問你D病歷問得好詳細。同埋作為一個醫生，點可以有唔舒服嘅病人你望都唔望佢，掂都唔掂佢呢？如果送院途中佢有啲咩唔舒服死鬼左，問返我轉頭原來我連個肺都冇聽過，我點樣配做一個醫生？所以其實嗰套PPE係唔可以重用！係因為我真係會掂病菌病毒！我唔會貪新怕死唔睇病，但係你唔可以任何Proper嘅裝備都唔俾我，送我去死。
做老細係要慳錢，但係唔係慳呢啲錢。所以點解我成日久唔久就要搵吓工，因為佢真係做好多呢啲令我心淡同煩膠嘅嘢。
佢仲有好多新嘅諗頭，叫我地點樣係極度開陽嘅環境底下，睇發燒病人。仲有想將啲懷疑感染嘅病人亦都擺喺啲好開陽嘅地方度。佢覺得咁樣唔會感染診所，但係佢唔諗下出邊啲人咁點算？點解懷疑個案要擺喺負壓房就係唔想將啲菌野開去。屯門醫院嗰單嘢，出邊等照肺片嗰12個人都要安排隔離，咁點解佢可以諗啲咁7嘅嘢？我將CHP感染控制嘅指引俾埋佢睇，喺私人診所嘅Setting，Isolation係要一間獨立嘅房，至少同其他嘅房有一米距離。佢當然唔聽。
同埋佢其實只係知會我哋佢嘅計劃，唔係有商有量。我嘗試好禮有禮貌地話比佢聽點解行唔通，俾佢啲好唔合邏輯嘅原因駁返我。攬炒係咪？Sorry唔係！ 因為老細甚少過嚟我哋診所。只有我哋瀨嘢，佢就安心返去湊女。
###
1. 嬲！Post左話我知!
2. 孖B ㊗️各位新年快樂，真係大家要身體健康！媽媽就要生意淡薄，日日Un Un腳，成日得閒打邊爐！
Search